Սուրճի ամենօրյա գործածությունը, անկախ քանակությունից, վտանգավոր չէ հղիների համար, պարզել են Քվինսլենդի համալսարանի գիտնականները։ Հետազոտության արդյունքները ներկայացվել են International Journal of Epidemiology պարբերականում։
Առողջապահության համաշխարհային կազմակերպության մասնագետները հղիներին խորհուրդ են տալիս չգերազանցել օրական 300 մգ կոֆեինի շեմը, ինչը համարժեք է օրական առավելագույնը 2-3 բաժակ սուրճին, սակայն այս խորհուրդը հիմնված է դիտողական հետազոտությունների վրա, որոնց դեպքում դժվար է տարանջատել սուրճի գործածությունը ռիսկային մյուս գործոններից։
Գիտնականները վերլուծել են կապը սուրճի գործածության, հղիության արդյունքների ու հարյուր հազարավոր կանանց գենետիկական առանձնահատկությունների միջև։ Ավելի վաղ արդեն հայտնի էր, որ որոշակի գենետիկ գործոններն ազդում են մարդու օգտագործած սուրճի քանակության վրա։ Քանի որ հնարավոր չէ հղիներին ստիպել ամբողջ հղիության ընթացքում խմել որոշակի քանակությամբ սուրճ, իսկ ինքնուրույն կազմված զեկույցները ոչ միշտ են ճշգրիտ, ապա սուրճի գործածության վերաբերյալ եզրահանգումներն արվել են գենետիկ պրոֆիլի հիման վրա։
Հետազոտության արդյունքում պարզվել է, որ սուրճի գործածությունը, անգամ եթե այն գերազանցել է սահմանված թույլատրելի չափաբաժինը, չի բարձրացնում հղիության ընդհատման, վաղաժամ ծննդաբերության կամ մեռելածնության հավանականությունը։
«Երբ խոսքը հղիության ընթացքում սննդակարգի մասին է, ապա կանանց հաճախ խորհուրդ են տալիս բացառել սննդակարգից սննդամթերքի որոշ տեսակները, սակայն այս հետազոտությունը ցույց է տվել, որ նրանք կարող են շարունակել սուրճ խմել՝ չանհանգստանալով բարձր վտանգի մասին», — նշել են հետազոտության հեղինակները։
Այնուամենայնիվ, այս հետազոտության ընթացքում դիտարկվել են միայն առավել վտանգավոր բարդությունները։ Չի բացառվում որ կոֆեինի չարաշահումը կարող է իր ազդեցությունն ունենալ պտղի զարգացման այլ ասպեկտների վրա, ուստի այս տեսանկյունից դեռ նոր հետազոտություններ է հարկավոր անցկացնել։